View this article in English | bilingual

Okuteeka Keeki Y’eihanga

Daudi yashutama, yahunama. Amaisho agahaangire za ripoota eziri omumaisho gye. Ebigambo nabireeba kwonka bambi ari nkotarikubireeba. Biri nk’ebirigurukyeera aharupapura n’omumutwe gwe. Reeba yakurura fairo yagyehisya reeru yaakuburira empampura; rumwe, orwakabiri, orwakashatu…. Byayanga. Yamyoora omunwa embari ya bumosho, okwo yagwihayo yagutooza aha embari buryo. Amatama nago gayehotora nk’omunwa. Buziima yaabihirwa n’ahameisho yashoberwa. Ariyo naatekateeka orukiiko rwa beebembezi ba gavumenti orwayine kutebekanisiza kurugiirira aha za ripoota ezi, obwo zitakahikire shaha itaano z’akasheshe. Ripoota y’enshohoza nikyo kintu kikuru ekiine okutensebwaho omurukiiko oru. Ekya kabiri eky’okutensebwaho n’ekirikukwata ahaby’obutegyeki, nkwoku eihanga rishemereire kuronda Mukuru w’eihanga, Presidenti, orikwiija kuza omu bigyere by’oriho hati.

Omusheija Daudi yashoberwa. Ngugwe naazaanisa akacumu ke arikukahuubahuuba omungaro, arikuteekateeka ebiteekateeko nk’omutwaro. Ripoota nashoma omushororongo gumwe, aza ahagundi kwonka byanga reeru agaruka ahuyatandikira. Ebigambo ebi arikushoma tibiri kumukorera makuru. Nayenda kuragiira omutwe gwe kufayo aha ripoota ekahwa kwonka omutwe nagwo ebyo tibyo guriho. Ekintu ky’ensikirano ya mukuru w’eihanga nikyo kyijwiire omu mutwegwe. Mbwenu, we nka Minisita w’ebyobwa Prezidenti, nahurira arikutwazibwa nk’omwojo w’omu Kelezia enkanturiki, abari kuheereza aharutaari. Nomanya oku barikwemerera bakareeba omusaserodooti naamira ka viinyo koona koona buzima, obwe bo barinzire okwakiira bakwozya egiraasi erimubusha. Nikwe Daudi arikuhurira hati. Okurinda abandi baragira.

Ripoota y’enshohoza eyi ariyo naakora neebaasa kureetera eihanga ryafeerwa obuhumbi n’obuhumbi bw’esente yaaba atagiteireho mutima akagikoragye. Nangwa, ebitongore ebirikuha eihanga eri obuyambi byamazire okurarika ngu nibiza okushara aha buyambi obubibaire nibiheereza gavumenti, yaaba gavumenti etahiire ripoota nungi y’enshohoza za sente z’ebyo ebitongore. Kwonkashi nooha orikufayo?

Daudi we nk’omuntu, amazire emyaka mingi arikukorera eihanga rya Kabira n’obwesigwa kandi arikufayo munoonga. Egi myaka yoona abiri n’etaano abire atarikufa ahakiintu ekindi okwihaho eiziina n’ekitiniisa kya Kabira.  Akabanza kukora nka memba wa paramenti, okwo yaarugayo yaaba Minisita w’ebyabakozi ba gavumenti, reru hati yaba Minisita we byo bwa Purezindenti. Kwonka kuri noomanya Purezidenti hamwe n’omuhwezi we ebi barikukora? Eh? Mbwenu bo, ekyaabo n’okumaza ensi amaguru obwe we Daudi arikukora egye haza akataho n’okubayamba kushwekyerera ebibarikukora byona. Obu baryaho nibagyenda kujwekyera eihanga omu mateerane g’ebiro bibiri kwonka bamarayo esabiiti ibiri obumwe n’okushobamu. Ebyo byona, Daudi niwe birikureeba, kureebeka ngu ebitabo by’enshohoza yaabo byahandiikwa gye birikubashwekerera.

Mbwenu ebimwe ebiri omu ripoota ye egi eyenshohoza n’orugyendo rw’omuhwezi wa Purezidenti obu yaajwekyera eihanga omurukiiko Landani. Mazima ateine nshoni, akasharamu we yatwara n’amaraaya we. Orukiiko kurwahweire, omukazi yamutwara omu maduuka, buzima  yaamugurira buri kimwe ekiyabire naayenda. Mbwenu kukyazoirwe ngu enshohoza y’omukazi ogu yoona ekakorwa aha sente z’omuhi womushoro, ni Daudi owashabirwe okushara amagyezi okubuzabuza amakuru ago. Ahonaho, bambe akahangahanga Minisita ondijo reeru yaagamba ngu ogwo Minista niwe yagyenzire n’omuhwezi wa Purezidenti. Kwonka kuyamazire kukibuzabuza, yaabagambira oku kitaanguhi kubuzabuza ekintu ekyo. Kwonka bo tibamuhurikiza baabyeta eby’okuzaana.

Hati ripoota ngigi yagaruka aha meeza ye yamutagarika. Manya ripoota egi eyine bingi. N’enyonyi ya mukuru w’eihanga eyabaire yaagambirweho omumakuru g’orupapura orwa Erisho - The Eye, okuyatweire nyinento arikuza ahabugyenyi bw’omuhara bw’okugeitwa Bufaransa. Ekyo kukyagambirwe, nabwe ni Daudi owahandikire ripoota yenshohoza egyo. Mbwenu mbibi byona byagaruki n’ekibuuza. ‘Nibashusha abarikuteekateeka ngu nyowe ninkora Magika. Noshusha ngu nibantamika empitirizo reeru bategyereza ngu ncwera keeki. Bagyenzi,’ naayeebuza.

Okugaamba amazima, Daudi aruhire okushwekyerera ebikorwa byabo ebitiine mutwe nakibunu. Eizooba rimwe, omwe ahabakazi abu Purezidenti arikukwana akasibirana Purezidenti omunju yamutiinatinisa kumwiita. Buzima akahara kakamukingirana omukishengye okumara obwire burikurenga ahashaha. Daudi niwe Purezidenti yaayesire kumuyamba. Obwe manya akamugira ati, ‘Ija hati hati onyambe, natuunga akazibu kakye.’ Okufa nookyeta akazibu kakye? Daudi we akamubeera owa mazima yamugira ati, ‘Abakazi aba nibaza kukwita mukama wangye.’ Onu nawe ati; ‘Ako kaaba kari akazibu kakye.’

‘Nikwe tinayaanga. Kwonka orekyere aho okuza omumaju gababakazi aba.’ Ogwe ni Daudi.

‘Reeru?’

‘Reeru ki?’

‘Nanye nikyo ndikubuuza. Reeru naaba ntagiireyo nimbitwaza nta?’

‘Mukama wangye, nozakureeba ekyokukora.’

‘Aha. Hati mbwenu, nyamba ondeebere ekyokukora reeru ongambire. Ekyo naakikurekyera.’ Daudi akaba nayenda kumugambira ngu ebyo bikaba bitari bimwe ahaby’omurimo gwe kwonka akasharamu yaahunama yaakora eki Purezidenti yaamushabire. Omubiro bikye, enju ekaba yayombekirwe. Mbwenu Purezidenti naakunda abakazi kwonka emirundi mingi Daudi nareeba enjara mpango ahamaisho gaabo bakazi kwonka we ebyo taine kakwate nabyo.

Manya na hati fairo zikimutegyereize. Mbenu hati yaazisiindika aharubajju. N’entebbe ngijo yaagisindika reeru yaayemerera. Yaatambura yaaza aha kooma kamaizi aha mukono gwabumosho gwe’emeeza ye. Yatangisiriza amaizi garikutagata omukakopo k’ekipapura reeru yagoohayo omurundi gumwe. Kwonka muntu we, amaizi nagwo tigamugirira nsha.

Okwo yaarugayo, yatambura nakakopo yagaruka aha meeza ye. Akakopo yaakiimata arikumwenyerera, kwonka obwo ekiniga kiri eky’okumwita. Akakopo akareeba kamuhindukira omuhwezi wa Purezidenti owayine omungaro. Amutambiika omu bokisi yakasasiro. Atyo ebiteekateeko bye byahinduka omukanya bwanya byaza aha mwojo owu arikukora nawe nk’omuhwezi we omu ofisi. Amugaambiire emirundi mingi mononga okushaba akabokisi ka kasasiro akandi akokuteeka haihi namaizi kugira ngu omuntu yaaheza kunyweera omukakopo, akatambike mukabokisi atagire kutambura nako. Eby’okutambika akakopo karimu otwiizi omu kabokisi akaharubaju rw’emeeza ye nibimubuza obusingye. Nayenda atungye akabokisi akaikushusha nk’ak’omu ofisi y’omuhwezi wa Purezidenti kwonka omwojo we naaguma naayebwa buri bwarikushaba ebindi bintu. Omwojo ogu naayebwa burikimwe. Nawe ni nka Daudi. Naayebwa ebintu bingi oteireho n’ebyo ebi ayine kwijusya Daudi. Daudi yayeraganisa eki araamuhaandikyeho obunaku bwokugamba ahamikorere ye bwaheza kwihika.

Daudi eby’amaizi hati yaabirugaho. Ngugwe yaagaruka amaisho yaagahanga ripoota y’enshohoza kwonka tiyashutama kugimaririza. Omutiima gwagaruka ow’omuhwezi wa Mukuru weihanga. Ngugwe yeigura orwigi yashohora yaaza kumuroonda. Ati, ‘obundi akampabura aha by’orugyendo rwa Landani,’ yaagamba wenka. Ku yaayigirira ofisi, yaahurira amaraka enyima y’orwiigi. Nawe omu mwanya gw’okutaahamu yaguma aheeru y’orwigi. Naahurira amaraka kwonka tarikuhurira bigambo. Yateekateeka ngu omuhwezi ari ahasimu nagambuura ba minisita abandi ahari Purezidenti, ninga nashaba obuhagizi ahari bataahi be nkokwu arikushaba Daudi burijjo. Yayecumitiriza kuhuriragye kwonka byayanga.

Obwe manya we Daudi ekiniga kyamukwasire. Nahurira nkokwenda kwigura orwigi akasindika omuhwezi wa Purezidenti omu kikabada kimwe eki arikumanya ngu tikirikwigurwa buriizooba. Mbwenu ekyo kuyaakukikora, ekisheija bakakishanga mukikabada bwanyima y’esabiiti nk’emwe ninga ibiri. Ebyo bikiri aho, yahurira ebigeere omunda omu ofisi. yaamanya ngu omugyenyi narishi omuntu weena ari omu ofisi ariyo nayimuka. Atyo Daudi yahanyaguza arikuteera entambo ndeigwa, arikutambika eminaga ye y’emikono kwebuzabuza. Yaheza yahinduka yakwata ogwa ofisi ye kwonka atakahikireyo, ahurira heine owamweta, ‘Hmm, ekyo ekisasayizi nikirungi.’ ogwe in Badru, mugyenzi wa Daudi owu bahereraine za ofisi.

‘Ndi kunanuura amaguru,’ Daudi yaamubeiha naamwenya.

‘Waba noyenda Omuhwezi wa Purezidenti?’

‘Ngaha. Ahabwenki?’

‘Nabuuza kwonka.’

‘Aah. Ngaha. Naba niinanuura amaguru. Okushutama munoonga nikirusya. ’

‘Hari mwine orukiiko rwa ba minisita akasheshe aka?

‘Eeih! Ahabwaki noobuza?’

‘Nabuuza kwonka.’

‘Aah. Eego. Orukiiko turwine.’ Daudi yaayebuzabuza ebi Badru arikwenda kwongyeraho, yaatambura yaaza omu ofisi ye. Ebya Badru nabimanya gye. Namanya ngu obuyabuuza ati, tikuri kubuuza bubuuza beitu ayine ebyarikwenda kwongyeraho ebi we atarikwenda kuzamu. Baduru ni nk’enjoka y’eibara rya kijubwe eri omu binyaatsi. Kwonka Daudi namukunda. Hakiri we natengatengyesa ebyo binyaatsi omanya ku arimu. Ezindi enjoka nizikugurikira otazimanyire. Ekokureeberaho, Badru ogu ti Minisita kwonka beitu naamanya byona ebirikufa omu ma ofisi gaabo okusinga bo benyine. N’engaambo nizitambatambura ngu niwe ‘Kutu’ kwa Purezidenti nobuharabe hariho abarikugira ngu Purezidenti tarikumwesiga. Tukugira ngu eki ni kikuru ahari Daudi omumuringo gwoona.

Daudi yaaza omu kashengye kye kokweyambiramu. Tikugira ngu  nayenda kweyamba kwonka nayenda kukeyambisa omuringo ogundi. Naayenda kumarayo akiire, abase kuteekateeka aha bintu ebi byoona hataine ari kumuteganisa. Nangwa yaayenda naayehunamira areka n’okuteekateeka nakamwe. Omu toyireti tayine kuboonabona nokugyezaho kushemeza omuntu weena, kaabe Purezidenti. Takwetaga kushereka okwakuhurira aha muntu weena. Ngugwe yaagumizamu yaaza aha toyireti yashumurura zipu y’empare ye ya bururu atyo atandika kushesha. Kwonka ku ataandika kushesha ati, ebiteekateeko bye bishuba bigyenda muntu we areeba ekibakuri kya toyireti kyahindukamu omutwe gw’omuhweezi wa Purezidenti. Atyo amureeba ati, 'Omuhwezi ogwu Yakobo n’omusiru baasi kandi nink’omushazi. Shana obuundi ekyo nikyo kyakuhisize omurimo.’ Ekibakuri nakyo kiti ohurire nkugarukemu.

Daudi kuyaaba akiri okwe, yaahurira nka kodi aharwigi rwa ofisi ye reeru yarahuka yaaugayo, ati, ‘Taahamu.’

Tihaine ayaataahamu. Shana kodi yaaba eri aha rwigi orundi. Ekyo yaakirugaho yaagaruka aha za ripoota ezishutami aha meeza ye. Ayijuka Purezidenti ekyamugambiire, ati; ‘Shoma ripoota egi, ogyetengyereze reeru neiwe ohandikye endiijo eyokugihozaho. Nitwiija kugigaaniiraho na ba Minisita tutakagiheire ekitongore eki. Otagira kiwagambira abashaki bamakuru,’ Purezidenti nikwe amugambiire. Ayongeraho ati; ‘Kubarateere esimu, obagyire ngu tokarebire kihandiiko kuruga omukitongore ebirikuha obuyambi. Abashaki b’amahurire noobamanya ebyaabo. Nibateere esimu babuuza, bacumitiriza barikwenda amakuru. Otagira ekiwagamba.’

‘Naakwetegyereza, Owekitiinisa.’

‘Iwe kubarakuteganise, bagambire ngu nituza kugiraho orukiiko rwabanyamahurire ripoota yahika eti omungaro zaawe. Tikyekyo?’

‘Kare, Owekitiinisa.’

‘Ebyasigara, naiwe nomanya eky’okukora.’

‘Eego Sebo.’

Ebyo byona Daudi yaabijuka. Hati yakwata akacumu ke yaagaruka aha ripoota n’omutima gumwe. Atyo ashoma nashara emisitari ahabunyiriri obwine mu ebyokugarukamu. Buri kushara omusitaari omunwa nigwezunguza omumuringu ogutarikwetegyerezibwa.

Daudi obwokumureeba atuura nakuratira okutebereza kwabanyamahurire n’orugambo kuruga aha ba Minisita aha bikwatireine n’orikubaasa kutwara obwa Purezidenti ogu oriho yaarugaho. Hati yaateerateera ekigyere kye ahansi n’ekiniga arikwijuka emirundi yoona eyi omuhwezi wa Purezidenti abire ow’okubanza aha mutwe gw’amaziina gaabo abi empapura z’amahurire zirikuteebereza ngu nibabaasa kwija kutwara obwa Purezidenti. Ekirikushasha Daudi, n’okugira ngu we, eizina rye rikaza omumahurire ago omurundi gumwe gwonka. Obwire obwo akaba nangwa eby’obwa Purezidenti atakabiteekateekireho munoonga kandi akaba ateine owuyakigambiireho. We, akaba naakora emirimo ye nkaburijjo. Bwanyima abanyamahurire bakamuhinguza nkaminisita wa Kabira orikusinga omumazima n’obwesigwa. Ba Minisita bingi bakabagambaho amafukure, kwonka Daudi we eizina rye rikaguma niryera tiitiiti. Eki kikamukora gye munoonga. Akashemererwa kureeba ngu, abantu ba burijjo nibakunda enkora ye. Ebyo byona bikabaho ira. Obwa hati, tikugira ngu nikimushemeza kwonka. Buzima naahurira naayenda munoonga kuba Purezidenti. Nangwa naabaasa kuba naasinga abandi boona okwetenga engoma. Kandi naiwe nookireba ngu akoreire eihangarye bingi nka minisita.

Daudi yananuura amaguru gye. Ekintu ky’oratwaare obwa Purezidenti kyamusimba omunda nk’eibaare rya tani igana. Bo nka ba Minisita, baine kusharaho ebintu bingi omurukiiko orubarikuzamu omukasheshe aka; oba Purezidenti niwe arashareho owokumugaruka omubigyere, oba ekitongore ky’eby’oburuuru kirateeze obururu, oba abarikwenda entebe barayesimbeho, oba eihanga rirasigare ryine ekibiina kimwe, oba nihaza kwesimbaho ebibiina bingi, n’ebindi n’ebindi. Nobu kitakubaire ekihandiiko eki, orugambo hamwe n’enteebereza nibitinisa. Ebintu by’eihanga eritakateraga oburuuru kuruga Purezidenti aza aha ngoma yaaruga omukishaka nabyo bigumire okutebereza.

Daudi ekyarikumanya gye, nk’abanyeihanga abandi, n’okugira ngu Purezidenti tarayesimbeho omurundi ogundi. Ebiro ebi, Purezidenti naaguma nagiira ati, ‘Hati obu naheza kutereeza obusingye bw’eihanga eri hamwe n’ebyentatsya yaryo, ninyenda kuruga aha ngoma nkahereza abandi omugisha nabo bakworeka eki barikubaasa kukora.’ Purezidenti eki naakigamba buri rukiiko n’oruteerane orwarikuzaho. Daudi naashaba munoonga ngu Purezidenti abe naamanya ngu nawe naabaasa entebe. Ati; ‘Nka yandangirira nk’omuntu arikubaasa kumuza omubigyere, burimuntu arikumuhagira nanye akampa obuhagizi bwe. Kwonka ogwo omusiru omuhweezi wa Purezidenti anshabire kumuhagira.’ Atyo ayijuka obu omuhweezi wa Purezidenti yamweeta omu ofisi ngu nibaza kugamba ahanshonga nkuru erikukwata aharibo bombi.  Puresha ya Daudi ekaba etembire esabiiti egyo kwonka akeefereza okureeba dokita we, beitu ngu obwo akagaaniira n’omuhwezi wa Purezidenti. ‘Nekintu kyomugasho ahabwa twembi.’ Nikwe yaamugizire.Onu nawe ati Buzima?”

Omuwhezi ati, “Eego buzima, n’ekyeitu tweena.” kahamya.

Eryo izooba Daudi kuyaatahire omu ofisi omuhwezi wa Purezidenti yaataho orwiigi, kworekyera kimwe ngu ebi baazamu n’eby’omuboonano.

Atyo atandika ati, ‘Hati noreeba mutabani wangye, Purezidenti weitu naaza kurekura entebe juba juba,’ Obwo ahari buri kigambo, akaba naatura omubi nk’omushema.

Reeru Daudi nawe amugarukamu ati, ‘Eego nikwe. Purezidenti nakigamba.’

Ati, ‘Iwe nookigambaho ki ekyo?’

Onu nawe ati, ‘Iwe waaba nookiteekateeka ho ki?’

Ati, ‘Nooreeba, Purezidenti owu twine hati, we n’omusilamu. Kandi iwe nanye turi abakurisitaayo.’

Onu ahuuma ati, ‘Hmm.’

‘Emyaka abiri n’etaano turikutegyekwa omusiramu! Iwe torikukireeba?’

Daudi ati, ‘Hmm.’ Ati, ‘Nkuhurire sebo. Mbenu nenki ekyi orikuteekateeka? Manya hati oriyo noompa ebiteekateeko bingi mbwenu gamba gamba mpurire.’

Ati, ‘Manya nikwe. Naanye nikyo naakweetera.’

‘Mpurikiriize.’

‘Nkoku nakugambira, iwe naanye turi abakurisitaayo. Neitwe twiine kugira ekitwakora ho.’

‘Hmm…hmm…hmm. Gumizamu.’

‘Eego manya ndiyo ninkugambira.’ Manya amwigirira, ati ‘Mbenu hati, noogira ngu nooha arikubaasa kumuza omubigyere okusiinga nyowe omushaija atwiire ari omuhweezi we egi myaaka yoona? Kandi nooreeba naitwe twiine okubagana keeki y’eihanga.’

Daudi atyo bimushobera. Omuringo ogwu omuhweezi wa Purezidenti arikukozesamu ekigambo ‘naitwe’ nikimubuza obusingye. Buzima nakikozesa oshushana ngu ninkw’omusheija hamwe n’omukyara we. Eryo izooa Daudi akahurira yaribwaribwa arikwenda kumugambira ngu ashemereire kufayo aha kuteeka keeki yeihanga nkoku arikufayo ahakugibagana. Nangwa atyo aza kukigamba kwonka kuyabaire yayeshamisa eminwa, omutima gwayanga reeru yayebuzabuza yaayeshesya n’obu yaabaire nahurira eihano.

Kuyaaherize kuhurikiza, amugambira ati, ‘Kwonka nomanya Sebo, nikibaasa kuba kitanguhi nkokwu orikuteekateeka. Nihabaasa kuba hariho abandi bantu baingi abarikwenda keeki egi nk’okuwagyeeta.’ Daudi agarukamu arikusheka. ‘Nikibaasa n’obutagira kakwaate n’adiini, engaanda, nangwa n’emyaaka.’ Ekigaambo ‘emyaaka’ kikaruga omu kanwa n’obwegyendesereza. Kwenda ngu bahereze aho okugaaniira Daudi akongyeraho ati, ‘Ninza kukuhagira, hatari ahabw’okugira ngu turi ab’ediini emwe kwonka nimanya ngu nobaasa.’ Daudi akeefuuza ekiyaagaambiire ekyo kandi na hati takakyesaasira ga. Omusiru akaikiriza buri nyuguta ahayindi. Kandi nakimanya gye ngu omumusheija ogwo, hariho obu arikutwara abaantu nkabatarikwetegyereza. Ekyo nikiganzya munoonga.

Hariho n’obundi obubabaire bari omurukiiiko rw’okutandiikaho akakiiko kw’okwebembera Kabira Rapid Response Initiative (KRRI) – Ekibiina Ky’okwirukirara aba Kabira. Omurukiiko orwo, Daudi akaba ariyo naashaba ngu hakaagira owatayo eiziina rye. Aho naaho, akatunga akabaruha karikuruga ow’omushaija ogwo. Daudi akashemererwa habw’okuba akaba naamanya ngu omubukiiko nkobwo nimwo abantu boona barikukira kworekyeramu emyooga yaabo. Mbwenu akamwenyo kakaba kari ahamaishogye obwo arikukuburira akabaruha ako. Akaba ashemereirwe ahabwokugira ngu omuhweezi wa Purezidenti mbwenuho akamuteekateekaho. Kuyashomire, akabaruha, yabanza banza omwiso gwaburabura. Atyo ayesiimura ahamaisho kugira ngu yaaza kwimusya omutwe kureeba ahukaruga, batamushoma ebi arikuteekateeka. Akeinama yaagarukamu yashoma akabaruha kwonka ebigambo bikaguma biri bimwe. Kakaba kari kagufu kandi karikuhikira ahanshonga, kati, ‘Daudi, mwana wangye heerezayo eiziina ryangye. Ninyenda kuhereza aha kakiiko aka. Webare.’ Daudi akaimutsya omukoono yaakora eki akabaruha kamushabire. Kwonka buzimazima akaba atakahurira ga omukono gwe gurikuremera gutyo n’orurimi rwe rwekwasire rutyo nkoku byabiire arikuheerezayo eiziina rya Yakobo. Kuyaherize kuriheerezayo ati, yahumiza yashaba ngu hatagira owashemba Yakobo. Kwonka mbenu, tibaramushembire kwonka. Ababisha bakamuha n’obw’obwebembezi bw’akakiiko. Orukiiko kurwahweire, Yakobo yatambura yaza owa Daudi yaamugira ati, ‘Mwana wangye, naakureeba noonshabira obwo waheeza kutayo eiziina ryangye. Mwana wangye n’onyesimisa.’

Daudi nawe ati, ‘Webare.’

Onu nawe ati ‘Webare munonga.’ Batyo bakwatana omungaro. Ebyo byona bikabaho ira ho. Daudi yaaba naaza kubyebwa hashuba haijamu ebindi. Nka hati, ripoota yamubuza obusingye. Atyo aza ahasimu ye kureeba eshaha ahizzaahika. Ashanga ngu okwiha naahika omu ofisi hahinguuraho eshaaha n’ekyicweeka beitu tihariho eky’omugasho kihango ekiyakozire. Ngugwe yaakurura ripoota yaagyehisya reeru yaayijuuka ebigaambo by’omukugu, Yosefu Murphy, omukitabo kye; Amaani g’omuntu Ow’omunda (The Power of the Subconcious Mind) omu arikugra ngu; Abantu beine amaani go kuhindura enteekateeka yabo.

Atyo Daudi nawe ayegambira ku ayine amaani gw’okukora eki arikwenda. Reero taata ashuba akurura ripoota obwo arikugira ati, ‘Orukiiko oru norwamaani mbwenu nyine kukora ekirikubaasika ntashwara.’

Shaaha itaano zaahika, Daudi ashutami omu kishengye omu akakiiko karikushutama. Yaayetebekanisa ebi araagambe kandi mbabo bari hakye n’okutandika. Manya obwo yaataho ekoti. Reeru taata ajweire n’esaati erikweera n’etaayi ya bururu bitarikubaasa kworeka oku yaabonabona omukasheshe arikutoorana eky’okujwara. 

Erizooba ba minisita boona bariho. Kwonka muntu we kubarikugamba, noohurira ngu ebibagambo tibirikuruga aha mitima yaabo. Nibagamba ebigambo buzima naiwe ohurira ngu nibiruga aha minwa. Boona tibarikushoborora. Kwonka nagwa nikabaasa kuba ekihandiiko ky’amatendero g’ebitongore ebikuha eihanga obuyambi neinga ekihandiiko ky’ebyobutegyeki bwa Purezidenti.

Ku bamara kutebenkana Purezidenti yaayimuka kwigura orukiiko. Daudi yaamukurasa amaisho. Nka buriijo, Purezidenti yaatandiikana n’ebyentasya y’eihanga ebyeyongire hamwe n’okubagambira oku kirikwetengesa abebembezi ba gavumenti okukwatanisa bakakorera hamwe eihanga rikagyenda omumaisho. Abagambira aha butabanguko obwehinguririize ensi kandi hamwe n’ebibashemereire kukorera. Agumiza ati, ‘Kabira neyenda abebembezi abaragirabye omubwire obugumire nk’obu. N’ahabwekyo, nyebuurize ah’abantu beingi abarikwetegyereza ebwobutegyeki bampabura ngu obwiire obu tikyamagyezi kutandiika eby’okushwijuma ekihaandiiko ky’ebw’obwebembezi bwa Kabira. Nikirungi twarinda eihanga rikabanza ryatuuza tutakateiremu empinduka.’

Obwo Purezidenti naagamba, Daudi naareeba ba memba bakakiiko barikuzuunguza emitwe mpora mpora. Tarikubaasa kwetegyereza yaaba baayikirizana nawe neingashi nabo byabashobera nk’oku byamushobera.

Manya Purezidenti agumizamu ati, ‘Katubanze twaheza obw’omungaro tubone kukununkirira obw’omukiibo. Ninyenda kubamanyisa ngu naambenu erizooba tituraagambe ahaby’obubutegyeki bwa Prezidenti. Nyebuurize h’abantu abanyabwengye reeru twasharamu ngu obwire kuburahikye, abarikwenda kwesimba omurimwe nangwa n’abandi omwihanga eri, nibaza kwemerera hamwe reeru abantu ba Kabira nibo baraasharemu owu barikwenda kukubembera. Emirimo yanyu n’ebikorwa byayu nibyo birikwiija kubahindura abebembezi beihanga ry’amaani nkeri.’ Bwanyima Daudi yaahurira yaaribwaribwa kubuuza Purezidenti ngu obwire obu nibuhika ryari, kwonka yaamara agahunama. Purezidenti nawe ati, ‘Ekyindi, ninyenda mumanye ngu abantu banshabire okwesimbaho ogundi murundi, kwonka tinkikiriize ahabw’okuba nimpurira nduhire. Beitu nitwijja kureeba eky’okukora obwire kuburahikye.’

Abantu boona baahunama. Daudi nawe yateeka omukono gwe gwaburyo aha za fairo ezimuri omumaisho reeru ogwabumosho guriyo niguzaniisa akacumu kye aki barikweta paaka peni. Ngugwe yarabyamu amaisho omubebembezi bataahi be kwonka tihine ekyi arikubaasa kushoma ahamaisho gaabo. Nomuhweezi wa Purezidenti nawe tihaine ekirikwereka yaba yakikunda nari atakikunda. Okwihaho, nobu burabe buri obwiire bw’akasheshe, obutondotondo bw’etuutu bwamwehinguririza obuso hamwe n’enyindo.

Daudi amaisho gye yageiha ahari Yakobo, yareeba aheeru y’edirisa. Atyo yaareebayo enyangye nyingi zoona zirikweera ziri omumwanya nizituuruura. Buzima zoona niziteerateera amapapa omumuringo ngumwe, zoona nizitoora obukiizi bumwe. Daudi yaamwenya n’ebinyonyi yaayebuuza nkwoku ekinyonyi ekyibyebembeire kyatunga ogwe mwanya gw’omumaisho. Yaashuba yaayebuuza yaaba ebikikurateire nibimanya ahi kirikubitwaara. Nangwa yaagumizamu yaayebuuza yaaba nakyo nikimanya eyikirikubitwara.

‘Eri eizooba, nituza kureeba aha matendero g’ebitongore ebirikuha Kabira obuyambi reeru tureebe eky’okukora. Mbwenu katuhurikize ebi Honarebo Daudi Okello atwiniire. Daudi, akazindaro nakaawe.’ Daudi bambe tiyaahurira Purezidenti. Akiriyo nareeba ebinyonyi ebirikweera aheeru y’edirisa.

‘Daudi, akazindaaro nakaawe,’ Purezidenti yagarukamu yaamweta. Daudi yaahinduka arikwenda kuteera enduuru ati omusiru ogu, kwonka yamwenya, ati, ‘Webare Purezidenti.’