Skip to content
For literary responses to COVID-19 from writers around the world, check out our Voices from the Pandemic series.
from the June 2004 issue

Oot Here Mae Lane

I lift't the harnesh fae ahint the oul doar, whur it haes hug

  fae iver I mine,

The cullar an' hames maybe ouler than me, an' a bit o' a

  ravell't oul' rein,

An' oul' bridle an' straps that sa' monies a crap, an' an oul

  snaffle that shines lak' a shillin',

I hae cover't some grun, but mae best deys be's done, I'm

  wake but mae spirit is willin',

But I coont that nae shame, the oul mere's joost the same,

  an her oul joints be's startin tae go, 

'but we're twa o' kine, we can read ithers mine, aw!

  I'll admit ye micht notice is' slow. 

Awa doon the bak' rodden an' it naw yit clear, in the

  quateness a jinglin'chain, 

A wee burd joins tae sing, for tae welcome the spring,

  man, it's nice tae be oot here yer lane, 

Ye wad think moather earth wus joost wakenin up', efter

  hir lang wunter sleep,

An' at the rut o' the dake somethin else is awake, for the

  snowdraps be's joinin' tae peep.


She stans near the slap an', I tigh'en the straps an' I yok

  tae the ploo yince again, 

The grass is still froze, she blows steam fae hir nose, man,

  it's nice tae be oot here yer lane, 

The rid earth turns o'er as wee lift the furst fur' an' the sun

  hunts the mist fae the lan', 

The grey ghosts dissappear, an' its noo gyely clear, on the

  headrig a minit we stan. 

An' I luk an' I think, sure lifes only a blink, an' mae three

  score an' ten's comin' shane,

But if ony mare's lent, it's oot here that I'll spen't, man, it's

  nice tae be oot here yer lane', 

I hae nae notion tae quit, for I'm naw joost dane yit, I can

  still ploo an acre a day, 

An' I'm as hearty's a wean, but for these dam't oul pains,

  man, I lake tae be oot here mae lane. 

I can weel mine the sale whun I first struck the dale, an' 

  the boy sez ye'll niver regret, 

I pye't richt an' dear for a three year oul mere'

  but she's walkin in front o' me yet, 

At thirteen I wus hir't, it's gyely time I retir't sixty years

  hae's flew by far ower shane, 

But whut wud I dae for tae pit in mae day, damn't I wud

  miss bein oot here mae lane.
Read more from the June 2004 issue
Like what you read? Help WWB bring you the best new writing from around the world.