Skip to content
Join us on October 26 at 7PM EDT for the 2021 WWB Virtual Gala. Learn more and get your tickets today!

Diabu kum Tripa

Intémpu, na rentu di matu, teng ses muler prenyada ta fiká. Kada dia olotu logu sai buská kumi. Olotu sinti muitu kansadu kauzu di olotu sa bariga. Mas dia mas grandi kum pezadu. Isti faze kum olotu muitu kansadu.Ungua dia, ses-ses santa papiá kauzu akeli trabalu. Ungua di olotu ja dá sintidu bai encontra kum feitiseira. Diski, akeli feitiseira podi judá kum olotu mas misti bai encontrá kum eli, Kintaféra anuiti. Olutu santa papia tantu oras. Tudu asedi kum akeli sintidu.

Kintaféra anuiti, olotu bai encontra kum feitiseira. Kabak ja ubi olotu sa trabalu, feitiseira, falá kum olotu kum sa song muitu brabu, “Kantu kere yo judá bolotudu toká ubi bong-bong ki yo kere falá. Bolotu misti sai buska kumi anuiti na mas. Mas chuma bos sa kabesa cum tripa. Bos sa bariga toká largá na kaza. Bolotu misti sai dozi oras, mas antu di tres oras pamiang bolotu misti bai bira. Kantu nungka, bolotu logu fiká Diabu kum Tripa per sempri. Kantu kere fiká jenti di tona, bolotu toká bebe sangi di parida.” Tudu ses muler intinde ki feitiseira ta falá. Midu logu toka feitiseiru) di akeili anoiti olotu sai buská kumi ate tres oras pamiang.

Tudu muler kontináa kum olotu sa kasade, chuma ki olotu faze kada anoiti ate ungua anoiti ja beng kasadur ja bai na rentu di matu. Eli ja encontrá kum ungua di Diabu kum Tripa. Eli ja sigi ate na kaza. Eli olá ki sorti olotu tuká fiká jenti di torna. Akeli anuiti, eli, spiá ki sorti olotu tuká fiká Diabu kum Tripa. Eli ja olá ses-ses muler, largá sa bariga na kaza. Kabak olotu sai, eli intrá na kaza, misturá olotu sa bariga. Tres oras, olotu bira, bai trus buská unsong sa bariga mas umpodi acá. Ja kabak di oras ta buská mas umpodi aca. Di akeili anoiti, olotu ja fiká Diabu kum Tripa per sempri.

Ubi stori de nus sa abok-disabok, tudu ja toká pegá di otru feitiseiru. Akeli kauzu umpodi enkontrá mas kum Diabu kum Tripa, ke, olotu ta merka kum bos na skuru.
 

Like what you read? Help WWB bring you the best new writing from around the world.