Skip to content
Words Without Borders is an inaugural Whiting Literary Magazine Prize winner!
from the September 2012 issue

شېھرىزاتنىڭ ئاغزىدىن ئۈزلۈكسىز ئۆتۈۋاتقان كېچىلەر

مەن ئولتۇرۇپ ئادەتلەنگەن
بىر ئاممىۋىي باغچىدىكى
دەرەخ شاخلىرىنىڭ قويۇق سايىسى ئاستىدا
كۈندۈزدىن ئاز-تولا بەھرىمان بولغاچ
ۋە سەيلە قىلغۇچىلارنىڭ يۈزىدىكى قۇياشنى
ھەمدە ئاسپىلىت يېرىقلىرىدىن چىملارنىڭ ئۈنۈشىنى كۆزەتكەچ
شېھرىزاتنىڭ ئاغزىدىن ئۈزلۈكسىز ئۆتۈۋاتقان كېچىلەرنىڭ مابەينىدە
يۈز بېرىۋاتقان قەتلە قىلىشنىڭ ئەھمىيىتى ھەققىدە ئويلىنىۋاتقىنىمدا
ھاياتىمنىڭ قاراڭغۇ ئەينەكلىرىدىن
تەقدىرىمنى ئايدىڭلاشتۇرۇپ بېرىش ئۈچۈن
مەندىن رۇخسەت سوراپ
بىر پالچى ئايال ئالدىمغا كەلدى

سۈكۈت ئىچىدە
ئۇنىڭ ھېلىگەر كۆزلىرىگە تىكىلگەنچە
ئۇزۇن ۋاقىت خىيالغا پاتتىم بولغاي
قارىسام
شېھرىزاتنىڭ ئاغزىدىن ئۈزلۈكسىز ئۆتۈۋاتقان كېچىلەردەك
قەدەملىرىنى تېزلىتىپ مەندىن ئۇزاقلاشتى
بۇ قەدەملەر
گوياكى سەيلە قىلغۇچىلارنىڭ بوينىغا ئېسىلغان قوڭغۇراقلاردەك
ئاڭلانمىغۈدەك ئاۋازدا ياڭرايتتى
بۇ قەدەملەر
گوياكى چىملارنىڭ ئۈنۈشىنى قۇتلاۋاتقاندەك
ئاسپىلىت يېرىقلىرىدىن
كۆرۈنمىگۈدەك نۇرلار بىلەن پارلايتتى


شۇ چاغ
بىز كۈندۈزدىن ئاز-تولا بەھرىمان بولغاچ
كېچىلەرنىڭ ئۈزلۈكسىز ئۆتۈشلىرىدىن قۇياشنى كۆزەتكەچ
ھەمدە پارلاق قەدەملىرىمىزدىن چىملار ياڭرىغان ھالدا
ئاممىۋىي باغچىلاردا سەيلە قىلىۋاتقاندىن بۇيان
ھەتتاكى ئاللاھ بىلەن شەيتانمۇ بىلىشكە ئاجىزلىق قىلغان
ئىنسانىيەتنىڭ ئىستىكىنى ئۇ پالچى ئايالنىڭ بىلىپ – بىلەلمەيدىغانلىقىنى
بىلىشنى خالايتتىم

 

                    2004- يىلى، كۇرتۇلۇش باغچىسى، ئەنقەرە

Read more from the September 2012 issue
Like what you read? Help WWB bring you the best new writing from around the world.